يا جماعة الخير كل سنة وإنتوا طيبين، الشتاء دخل خلاص وبدأنا نسمع الكحة والعطس في البيوت والمدارس والنوادي. وده طبيعي لأن موسم الشتاء من أكتر المواسم اللي بنشوف فيها نزلات البرد والإنفلونزا عند الأطفال. وعلشان كده حبيت أكلمكم شوية كنصائح بسيطة تساعد أطفالكم يعدّوا الشتاء بهدوء ومن غير مشاكل كبيرة.

أول حاجة عايزة أقولها إن الدفا مش معناه نكتم الطفل في 3 طبقات هدوم ونمنعه يتحرك. بالعكس، المهم إن الطفل يلبس لبس طبقات خفيفة تقدري تقلليها أو تزوديها حسب المكان والحرارة، لأن التعرّق وبعده البرد من الحاجات اللي بتزود تهيّج الجهاز التنفسي.

الشتاء كمان هو الموسم اللي بتزيد فيه الفيروسات، وده اللي بيخلّي الأنف تسيل والكحة تزيد والحلق يتعب. وده مش معناه إن كل طفل محتاج مضاد حيوي، بالعكس معظم الحالات بتتحسن بالراحة والسوائل والمراقبة، لكن طبعًا في حالات لازم نتابعها.

من الحاجات اللي بتركز عليها في العيادة إن المناعة محتاجة غذاء كويس. شوربة خضار، فاكهة غنية بفيتامين سي زي البرتقال واليوسفي والكيوي، والعسل بعد عمر سنة، والزبادي. لازم كمان نفكر نذكّر الطفل يشرب مياه لأن في الشتاء الأطفال بينسوا يشربوا فده بيقلل المناعة ويزود جفاف الجسم.

في غلطات بشوفها كتير كل يوم، زي النوم على مخدات عالية علشان الكحة، أو تشغيل السخانات على وش الطفل مباشرة، أو تقفيل البيت بدون تهوية، أو إننا نقول “ده برد بسيط” ونسيبه لحد الموضوع يتطور لالتهاب صدري أو جيوب أنفية.

عايزة بس أفكر الأمهات إن في علامات لازم وقتها نروح العيادة ومنها الحرارة اللي بتزيد عن يومين، أو الكحة اللي بتسبب ضيق نفس، أو قلة رضاعة عند الرضع، أو كحة مصحوبة بصوت صفير أو تعب واضح في النفس، أو لو الطفل بقى كسلان ومش على طبيعته.

الشتاء محتاج متابعة بس محتاج برضه هدوء وصبر. أغلب الأطفال بيتحسنوا لو وفرنالهم دفا معتدل، أكل كويس، شرب سوائل، وراحة. وربنا يحفظ ولادكم ويخلّيهم دايمًا في أحسن صحة.