في الفترة الأخيرة، لاحظت إن كتير من الناس بقت تسأل عن مقاومة الإنسولين، مش بس المرضى، لكن كمان اللي مهتمين بصحتهم وبيتخوفوا من أي عرض بسيط يحسّوا بيه. واللي لفت نظري أكتر إن جزء كبير منهم ما عندوش فكرة واضحة عن الموضوع.

علشان كده، حابة أشرحها بشكل بسيط وواضح.
في جسمنا هرمونات كتير، لكن من أهمهم الإنسولين، اللي بينتجه البنكرياس. دوره إنه يساعد السكر يدخل الخلايا علشان الجسم يقدر يستخدمه كطاقة. المشكلة بتحصل لما الخلايا تبتدي ترفض تستجيب له، وساعتها السكر يفضل عالي في الدم، والبنكرياس يشتغل أكتر وأكتر علشان يعوّض، ومع الوقت بيتعب… وده بيأثر على الجسم كله.

اللي يقلق فعلاً إن في أعراض كتير ناس بتعدي عليها وما تربطها بالحالة دي. زي مثلاً التصبغات اللي بتظهر حوالين الرقبة أو تحت الإبط، أو الإحساس بالجوع بعد فترة قصيرة من الأكل، كأن الجسم مش شبعان أصلًا، أو حتى التعب المستمر وصعوبة نزول الوزن رغم المحاولات.

أنا دايمًا بنصح مرضاي وأهلي إننا نبدأ من الأساس:
نرجّع لعادات الأكل الصح، نحاول نقلل السكريات والدهون، نتحرّك بشكل يومي حتى لو بنمشي نص ساعة، وننام بشكل منتظم وبالليل خصوصًا، لأن النوم من الحاجات اللي بتأثر على التوازن الهرموني بشكل كبير.

ولو الحالة وصلت لمرحلة محتاجة تدخل طبي، ساعات بنلجأ لأدوية أو إبر زي مونجارو أو أوزمبك، وده طبعًا بيكون حسب تشخيص الطبيب.